Histórica manifestación na defensa da lingua

Máis de cincoenta mil persoas ateigaron as ruas de Compostela hoxe día 17 de maio de 2009, berrando consignas en favor da lingua Galega.
Somos país grazas a Lingua, e a nosa, en Galiza en Galego por suposto. Temos entre todos nos, a conciudadáns que respectan a nosa lingua, e ata o momento vivimos en armonía, se maniqueístas imposicións como din por aí fora. Coa manifestación pacífica de hoxe, amosase que os galegos somos xente noble, de paz, de ben; e o Galego máis que lles pese algún(algunha), non vai esvarecer, namentras unha cidadanía berre como o fixo hoxe, polas ruas Composteláns.

A praza da Quintana quedou pequena para tanta xente que asistiu á convocatoria de A MESA, ainda a pesares das inclemencias do tempo. Na imaxe actores da compañia Zancalino colaborando na organización da manifestación.



Sobre a unha do mediodía xa chegara a cabeza da manifestación a praza da Quintana e ainda había xente que non se poidera mover da Alameda.




Milleiros de manifestantes soportaron as inclemencias do tempo Compostelano, que por veces saía unhas raiolas de sol, como escomezaba a chover intensamente.



Xose Manuel Beiras estivo na Praza da Quintana. Aos que non se viron por ningures foi aos de Galicia Bilingüe.




A praza da Quintana sobre a unha do mediodía, cando emprezaba a encherse. Debido ao éxito da convocatoria, que os de A MESA non preveían en absoluto -debido a grandes fallas na organización-, a praza tivo que baleirarse ata en tres ocasións para dar cabida ao resto dos manifestantes espallados polas ruas veciñas.

Fotos: SusoPb (Copyleft)

17 de maio, día de compromiso coa lingua

Unha lingua é máis que unha obra de arte; é matriz inesgotable de obras de arte

Se aínda somos galegos é por obra e graza do idioma

CASTELAO «Sempre en Galiza»

Hoxe non é posible manter unha relación interna coas empresas na nosa lingua. As normas non están en galego, os cursos de formación non son en galego, as instrucións que recibimos non están en galego e en moitos casos falar galego «no ayuda en la carrera profesional». Só hai que coller un xornal, acender a televisión, escoitar a radio, ir ao cine ou ter un xuízo para ver que o galego, malia ser o idioma maioritario en Galicia, está infra-representado en amplos ámbitos da nosa vida cotián.

Con todo, o idioma que nos une está sendo vítima dun ataque descarnado, centrando un debate político ficticio por intereses electoralistas, tratando de convertelo nunha fonte de confrontación.

Participa na manifestación o 17 de maio do 2009 en Santiago de Compostela (A Coruña).

A cita podesla grabar na túa axenda, do teu móbil ou PDA, ben descargando no teu ordenador o arquivo .vcs (o estándar de vCalendar para organizar axendas e calendarios) para envialo deseguido, por Bluetooth, ao teu móbil (ou PDA) e, engadir dese xeito máis doadamente; ou ben, podes empregar a cámara do teu móbil para que interprete os seguintes códigos de barras, segundo o lector que teñas instalado; por este orde, QRCode que é un formato estándarizado, EZCode ou tamén chamado Bidi para Movistar e DataMatrix que incorporan algúns terminais e operadoras de telefonía.


_{Imaxes de códigos de barras de QRCode, EZCode e DataMatrix (por ese orde)}

[Preme sobre as imaxes para amplialas]

Actualización: A convocatoria foi un éxito, cifrase nunhas cincoenta mil persoas que asistiron, ainda a pesares das inclemencias do tempo.

Pola Convivencia e Igualdade do Galego

Con esta entrada (ou POST) queremos manifestar, perante quen sexa:

1. O pobo galego ten dereito a que a súa lingua propia (orixinaria) sexa oficial a todos os efectos no seu ámbito territorial. Os usuarios do galego deben desfrutar no seu territorio do mesmo status legal que o castelán ten no seu..
2. A situación do galego está moi lonxe de ser así. Non desfrutamos de dereitos lingüísticos plenos para desenvolver a nosa vida diaria con normalidade na nosa lingua na nosa terra. Son os falantes do galego os que resultan discriminados. É o galego o que corre perigo como idioma e os galego falantes os que non son debidamente respectados. Vivimos unha grande inxustiza que é a negación da igualdade e da verdadeira convivencia.
3. Por iso, resulta realmente preocupante que, desde Madrid, con apoio de importantes medios de comunicación, haxa quen pretenda convencer á opinión pública de que o castelán corre perigo de desaparición e que os seus falantes son discriminados no noso país. Esta inversión da realidade ten como obxectivo que os falantes do galego non teñan dereitos lingüísticos e que os únicos deberes para as Administracións públicas se vinculen ao castelán.
4. O verdadeiro problema non está na cooficialidade de idiomas como o galego, senón na actitude de quen nega a existencia de pobos e linguas diferentes no Estado español. Esta actitude si é a negación da convivencia e da igualdade. O proceso de normalización de usos do galego foi lento e, até hoxe, insuficiente para garantir o dereito a vivir nesta lingua. O que compre é respectar a legalidade vixente (Estatuto e Lei de Normalización Lingüística) e avanzar con cambios legais na dirección da igualdade e da convivencia. Xustamente a dirección contraria á proposta polos que pretenden a imposición do castelán como único idioma con dereitos e deberes para os cidadáns en todo o territorio do Estado.
5. Correspóndelle ao pobo galego, a través das súas institucións representantivas, definir a política lingüística acorde co criterio de cooficialidade e de lingua propia que mesmo o actual Estatuto recoñece para o noso idioma. Esperamos o compromiso das institucións de autogoberno na defensa da igualdade plena de dereitos para o galego e na aplicación de medidas a favor da normalización dos seus usos. Neste labor contarán sempre co noso apoio.
6. Alertamos á sociedade galega para non se deixar confundir e instámola a cavilar sobre a verdadeira situación do galego no propio país.
   

Defendemos un dereito humano elemental que nos define, ademais, como pobo diferenciado. Debemos ser firmes rexeitando todo posicionamento que persiga recortar dereitos ou retroceder no cativo camiño andado tanto nas administracións públicas, como na vida social.

Si estas de acordo con este manifesto, A MESA esta a recoller sinaturas; asina e difunde esta mensaxe.